Стала вядома, наколькі скарацілася колькасць лекараў у адной з абласцей Беларусі за два гады.

• 5.04.2025, 18:27

Медыцына адчувае сур'ёзны кадравы голад.

Беларуская медыцына не першы год адчувае кадравы голад. Многія медыкі з'ехалі з краіны (і працягваюць з'язджаць) у тым ліку праз палітычныя рэпрэсіі, піша «Салідарнасць».

Улады ж заяўляюць, што ў медычнай сферы "ўсё пад кантролем", недахоп працоўных рук вырашаюць запрашэннем на працу замежнікаў.

І ўсё ж, афіцыйныя звесткі сведчаць пра сур'ёзныя кадравыя страты ў беларускіх паліклініках і бальніцах. Так, напрыклад, сістэма аховы здароўя на Віцебшчыне скарацілася на сотні спецыялістаў.

Да такой высновы прыйшоў тэлеграм-канал «Віцебск, я гуляю», які вывучыў афіцыйную статыстыку Мінздара за 2022-і і 2024-ы.

Так, калі ў канцы 2022-га ў рэгіёне працавала 5027 практыкуючых лекараў, то паводле вынікаў 2024-га - толькі 4,4 тыс. Мінус больш за 600 чалавек. Сярэдніх медработнікаў стала менш амаль на 1400 - іх колькасць скарацілася з 14927 да 13500.

Падае і ўзровень забяспечанасці насельніцтва. Два гады таму на 10 тысяч жыхароў вобласці прыпадала 46 практыкуючых лекараў і 137 медсясцёр, зараз - 41,4 лекара і 125,6 сярэдняга персаналу. Гэта не проста статыстыка: гэта чэргі, недаступныя паслугі і выгаранне тых, хто застаўся, прыходзіць да сумнай высновы канал.