Супраць палітычнай зняволенай Вікторыі Кульшы распачалі новую крымінальную справу
- 3.04.2025, 14:25
Яна мусіла выйсці на волю 6 красавіка.
Палітычную зняволеную Вікторыю Кульшу перавялі ў СІЗА Гомеля. Яна мусіла выйсці на волю 6 красавіка. Але на яе чацвёрты раз завялі крымінальную справу паводле арт. 411 - гэта пятая крымінальная справа супраць яе і чацвёртая менавіта паводле гэтага артыкула, піша dissident.by. Вікторыя Кульша была адміністратаркай чата «Кіроўцы 97%», за што была затрыманая 4 лістапада 2020 года. У выніку яе асудзілі на 2,5 гады пазбаўлення волі. У чэрвені 2022 года Вікторыю Кульшу ўпершыню асудзілі паводле арт. 411 (злоснае непадпарадкаванне законным патрабаванням адміністрацыі папраўчай установы). На той момант у яе было ўжо 34 спагнанні. Чарговы суд над жанчынай пачаўся ў красавіку 2023 года, дзе ёй зноў прысудзілі яшчэ адзін год зняволення. А ў кастрычніку 2023 года Вікторыю Кульшу асудзілі трэці раз і зноў дадалі 1 год па 411 артыкуле. Дагэтуль жанчына правяла 7 месяцаў у СІЗА і мусіла выйсці на волю 6 красавіка 2025 года. Але супраць Вікторыі распачалі чацвёртую крымінальную справу. Цяпер блізкія да яе сям'і паведамляюць, што яна знаходзіцца ў СІЗА-3. Усяго Вікторыя ўжо адбыла ў зняволенні 70 дзён у штрафным ізалятары і 6 месяцаў у ПКТ. Таксама вядома, што супрацоўнікі жаночай калоніі № 24 у Зарэччы прымянялі да жанчыны псіхалагічны і фізічны ціск. Паведамляецца, што адзін з наглядчыкаў душыў Вікторыю локцем, стоячы ззаду, а таксама цягаў яе па камеры. Акрамя гэтага, яе часта абражалі і зневажалі перад іншымі наглядчыкамі. У сваіх інтэрв'ю былая палітычная зняволеная Паліна Шарэнда-Панасюк згадвала Вікторыю: «У Вікторыі Кульшы, напэўна, ужо адмовілі ныркі. Яна трымала галадоўкі месяцамі, адмаўлялася ад вады і ежы. Яна ўспорвала сабе вены. Яе кідалі за гэта ў штрафны ізалятар — і там яна зноў успорвала сабе вены. Яна трымала галадоўкі ў ПКТ. Яна адмаўлялася ад дапамогі лекараў».