«Вольны Хор» абвясціў збор сродкаў на новы альбом «Наша песня»

• 3.04.2025, 12:25

У альбом увойдуць і вядомыя сучасныя творы беларускіх артыстаў.

Новы альбом будзе складацца з 17 беларускіх твораў, сярод якіх значную частку складае беларуская харавая спадчына, знойдзеная ў Francis Skaryna Belarusian Library and Museum in London.

«Мы спадзяёмся, што вяртанне забытых і невядомых твораў узбагаціць нашую культуру і стане важнай сувяззю для нас з каранямі і гісторыяй. У альбом таксама ўвойдуць творы сучасных кампазітараў, напісаныя на вершы расстраляных паэтаў, няхай памяць пра іх гучыць! Будуць у альбоме і вядомыя сучасныя творы беларускіх артыстаў у харавых апрацоўках, якія знойдуць новае гучанне. Для запісу альбома патрабуецца 4700 еўраў. Спяваем разам і нясём нашу песню па ўсім свеце!»

- распавялі сайту Charter97.org у прэс-службе «Вольнага Хору»: Альбом будзе размешчаны на ўсіх музычных онлайн пляцоўках з бясплатным доступам і выдадзены тыраж дыскаў для бясплатнага распаўсюджвання. Падтрымаць новы альбом можна праз спасылку.