У Свярдлоўскай вобласці РФ абрынулася шахта Дзерыпаскі ў здабычы баксітаў

• 3.04.2025, 11:22

Гэта ўжо другі такі інцыдэнт за паўгода.

Увечары 2 красавіка ў Севераўральску на шахце «Нова-Кальінская» адбылося абвальванне пароды на адзнацы 1010 метраў, піша The Moscow Times.

Загінуў 30-гадовы горнарабочы ачышчальнага забою, паведаміла ўправа Следчага камітэта Свярдлоўскай вобласці.

Ведамства пачало праверку, паводле вынікаў якой будзе прымацца пастанова аб распачынанні крымінальнай справы паводле артыкула 217 КК - "Парушэнне патрабаванняў бяспекі на небяспечных вытворчых аб'ектах".

Максімальнае пакаранне, у выпадку гібелі чалавека, прадугледжвае 5 год пазбаўлення волі. Таксама будзе праведзеная судмедэкспэртыза для выяўлення дакладнай прычыны смерці гарняка.

Абласная пракуратура ўдакладніла, што падзенне адбылося за паўгадзіны да паўночы. Тым часам на адцінку знаходзіліся сем чалавек, шэсць з іх змаглі падняцца на паверхню. Наглядны орган пачаў праверку захавання мер бяспекі пры правядзенні горных работ і заканадаўства аб ахове працы.

Гэта ўжо другі такі інцыдэнт на «Нова-Кальінскай» за паўгода. Папярэдні адбыўся 12 снежня. Тады праз абрынанне горнай пароды таксама загінуў працоўны - яму было 25 гадоў. А 6 снежня там знайшлі цела 37-гадовага машыніста свідравой устаноўкі. Паведамлялася, што смерць наступіла ў выніку інфаркту. На шахце здабываюць баксітавую руду, з якой атрымліваюць алюміній. Актыў належыць АТ "Субр". З 2007 года кампанія ўваходзіць у склад "Русала" мільярдэра Алега Дзерыпаскі. Вытворчая магутнасць шахты - 800 тысяч тон баксітаў на год.