Амбасадару РФ Грызлову мроіцца «паўзучая паланізацыя» Беларусі
- 2.04.2025, 21:07
Дыпламат пужае Лукашэнку “еўрамайданам”.
Рукамі беларускіх палітычных эмігрантаў "рэалізуецца чарговая спроба паўзучай паланізацыі" Беларусі. Такая заява змяшчаецца ў артыкуле пасла Расеі ў Беларусі Барыса Грызлова да "дня яднання народаў", распаўсюджанага дыпмісіяй і прапагандысцкімі рэсурсамі РФ, звярнуў увагу «Позірк».
“Іх (палітэмігрантаў. — Заўв. рэд.) галоўная зброя — мяккая сіла, якія прываблівае публікацыі ў сацсетках, бяскрыўдныя на першы погляд вірусныя відэаролікі і старанна аформленыя ў пазнавальныя матэрыялы пра “слаўныя” біяграфіі псеўдагерояў, якія на справе з'яўляюцца здраднікамі і прыгнятальнікамі беларускай культуры, мовы.
Ён назваў гэта часткай “вялікай і старанна спланаванай інфармацыйна-псіхалагічнай спецаперацыі, закліканай закласці каштоўнасны і ідэалагічны падмурак для наступнага фармавання нацыяналістычнага руху, які ў выніку павінен выліцца ў чарговы “еўрамайдан”.
Са сцвярджэнні дыпламата, супраць Масквы і Менска нібыта вядзецца "гібрыдная агрэсія, развязаная заходнімі элітамі".
“Гэтая небяспечная гульня, накіраваная таксама супраць саюза Расеі і Беларусі, заклікана сфармаваць у брацкага беларускага народа фальшывы вобраз варожага моцнага суседа, які марыць - не зусім зразумела навошта - падпарадкаваць і захапіць. У крывым люстэрку такога ўспрымання інтэграцыя паўстае ці ледзь не каланіяльным працэсам, несумяшчальным з захаваннем Беларуссю дзяржаўнага суверэнітэту”, - мяркуе ён.
"Заходняя прапаганда", паводле версіі Грызлова, "стараецца перакруціць гісторыю ўзаемадачыненняў расейцаў і беларусаў": "Разбурыць наш духоўны пачатак".
Амбасадару ў сувязі з гэтым “відавочная пагроза, якую тоіць у сабе патуранне разбуральнаму ашалеламу нацыяналізму, які ўкараняецца ў адмаўленні этнакультурнай роднасці ўсходніх славян”. На ягоную думку, "менавіта такі сцэнар быў рэалізаваны на Украіне" (арфаграфія захавана. - Заўвага.).
Паводле яго сцвярджэння, прасоўваецца тэза, што Беларусь "нібыта з'яўляецца часткай заходняй цывілізацыі", "з народнай памяці старанна вымочваюцца старонкі не такой даўняй гісторыі, якая папярэднічала вызваленню Чырвонай арміяй у 1939 годзе Заходняй Беларусі ад польскай акупацыі".