Каля нацыянальнай бібліятэкі ў Менску забіў «фантан»

• 2.04.2025, 9:44

Рух абцяжараны.

У Менску каля Нацыянальнай бібліятэкі ў сераду, 2 красавіка, забіў "фантан". Відэа аварыі з'явілася ў сацсетках, пра гэта паведаміла і дзяржагенцтва «Минск-Новости».

"Праз прарыў водаправоднай трубы паблізу Нацыянальнай бібліятэкі падтопленая праезная частка праспекта Незалежнасці пры руху ў бок МКАД, а таксама абцяжараны рух па праспекце Незалежнасці з боку вуліцы Макаёнка ў кірунку вуліцы Жасмінавай", — паведамілі ў ДАІ.

Дзяржаўтаінспекцыя просіць улічваць гэтую інфармацыю пры выбары маршруту.

"Фантан" ля нацыянальнай бібліятэкі забіў праз пашкоджанне трубы дыяметрам 1000 мм. Гэта адбылося а 8.29 падчас працы будаўнікоў, паведаміў «Мінскводаканал».

Распачатыя работы для лакалізацыі пашкоджання.У сувязі з аварыяй змяніўся рух грамадскага транспарту.Рух тралейбуснага маршруту № 42 арганізаваны па вул. Філімонава, Кедышкі, Талбухіна, Кедышкі, Каліноўскага; № 41 і аўтобусаў маршрутаў № 27, 80, 91, 95, 113с, 939 — па вул. Філімонава, Кедышкі.