«Цюльпанавая ліхаманка» ў Менску

• 7.03.2025, 16:06

Якія кошты напярэдадні 8 сакавіка.

Напярэдадні 8 сакавіка ў Менску сапраўдная «цюльпанавая ліхаманка». На днях у сталіцы з’явіліся больш за 180 гандлёвых пунктаў, на якіх дазволена прадаваць кветкі. Акрамя таго, кветкі прадаюцца не толькі ў спецыялізаваных крамах, але і ў прадуктовых крамах і гіпермаркетах, на рынках, піша «Салiдарнасць».

Гандляваць кветкамі на гарадскіх пляцоўках могуць толькі фізічныя асобы, якія вырасцілі кветкі ўласнымі сіламі ў цяпліцах на сваіх прысядзібных надзелах, ці прадпрыемствы, якія займаюцца вытворчасцю кветкавай прадукцыі.

Больш за ўсё дазволаў на гандаль кветкамі ў Менску напярэдадні 8 сакавіка атрымалі прадпрымальнікі з Берасцейскай вобласці, якія вырошчваюць цюльпаны.

Кошты гэтых кветак фізічныя асобы могуць устанаўліваць самастойна, але «задзіраць» іх не атрымаецца, гарадскія ўлады папярэдзілі, што каб пазбегнуць неабгрунтаванага росту коштаў напярэдадні свята Менгарвыканкам і МАРГ будуць за гэтым сачыць.

Кошты цюльпанаў стартуюць ад 3-х рублёў і вышэй.

У продажы ёсць і іншыя кветкі: прымулы і гваздзік у вазонах па 20 рублёў, мімоза - 25 рублёў галінка.