Трансмежавы пажар перакінуўся з Украіны на беларускія балоты

• 26.02.2025, 12:10

Тушэнне пажару можа быць ускладненае праз спецыфіку мясцовасці.

Позна вечарам 25 лютага ў Беларусі зафіксавалі першы трансмежавы пажар у новым пажаранебяспечным сезоне. Ён адбыўся на тэрыторыі Палескага лясгаса, на мяжы з Украінай, піша "Тэлеграф".

Са звестак Міністэрства лясной гаспадаркі Беларусі, пад вечар 25 лютага агонь перакінуўся з Украіны на беларускія тэрыторыі. Да месца надзвычайнага здарэння накіравалі спецыялістаў дзяржаўнай лесааховы Палескага лясгаса, аднак тушэнне пажару можа быць ускладненае тым, што агонь распаўсюджваецца па балоцістай мясцовасці.

Раней у гэты ж дзень спецыялісты зафіксавалі яшчэ адзін пажар на тэрыторыі гэтага ж лясгаса - у 204 квартале Рубельскага лясніцтва. Там загарэўся трыснёг на балоце, аднак асяродак узгарання ўдалося аператыўна лакалізаваць і да вечара, паводле справаздачы ведамства, пажар ужо быў патушаны.

У Мінлясгасе таксама паведамілі, што ў сувязі з чаканым хуткім рэзкім пацяпленнем, а таксама прагнозам сіноптыкаў, якія паабяцалі Беларусі дастаткова сухую вясну, камісія ведамства ў надзвычайных сітуацыях прыняла пастанову пачаць планавыя дзяжурствы ў лясным фондзе раней, чым звычайна.