Прэм'ер Польшчы пасля «выходных мары» на гарналыжным курорце цяпер на мыліцах

• 25.02.2025, 21:38

Ісці на бальнічны Дональд Туск не збіраецца.

Прэм'ер-міністр Польшчы Дональд Туск траўмаваўся ў гарах у мінулыя выходныя, аднак ісці на бальнічны не збіраецца. Пра гэта ён расказаў 25 лютага ў сацсетцы X.

Паводле ягоных словаў, некалькі дзён адпачынку на лыжах з унучкамі «павінны былі быць выходнымі мары», якія ён планаваў паўгода.

«Яны [унучкі] на схіле сказалі: “Пакажы, дзядуля, як ты катаешся”. Вось я і паказаў», – іранізуе Туск.

Кіраўнік польскага ўраду адзначыў, што з мыліцамі і накаленным артэзам, якія відаць на відэа, ён будзе працаваць яшчэ некалькі дзён.

«Вядома, я не пайду на бальнічны, хоць напэўна некаторыя людзі хацелі б гэтага», – сказаў прэм'ер.

Ён адзначыў, што ягоны расклад застанецца без зменаў, і заклікаў людзей быць асцярожнымі ў гарах і правяраць лыжы.